កម្ពុជាប្រារព្ធការតាំងពិព័រណ៍វិស័យសំណង់អគារវិស្វកម្ម និងឧស្សាហកម្មទឹក​ខ្នាតអន្តរជាតិធំជាងគេ​លំដាប់លេខ១

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា យើង​រួមគ្នាកសាង​នូវ​ឧស្សាហកម្មអចលនទ្រព្យ ឧស្សាហកម្មគ្រឿងបង្គុំសំណង់ ឧស្សាហកម្ម​គ្រឿងតុបតែង និងឧស្សាហកម្មធនាគារ ដើម្បី​ឧត្តមប្រយោជន៍ប្រជាជន និងប្រទេសជាតិ ។ឯកឧត្តមឧបនាយក​រដ្ឋមន្ត្រី​បញ្ជាក់យ៉ាងដូច្នេះ​នៅក្នុងពិធីបើក​សម្ពោធ​ការតាំង​ពិព័រណ៍​វិស័យ សំណង់អគារវិស្វកម្ម និងឧស្សាហកម្មទឹកខ្នាតអន្តរជាតិធំជាង​គេលំដាប់លេខ១នៅកម្ពុជាកាលពីព្រឹកថ្ងៃទី១១ ខែកញ្ញា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ។

ឯកឧត្តមឧបនាយករដ្ឋមន្រ្តីបានលើកឡើងថា ព្រឹត្តិការណ៍នេះ​ ជា​ទស្សនៈវិស័យរួមសម្រាប់ទាំងអស់គ្នា​ ដើម្បីដើរលើផ្លូវរួមគ្នាក្នុង​ការ​ផ្ដល់​ឧត្តម​ប្រយោជន៍​​ដល់ប្រជាជននិងប្រទេសជាតិ យើងអាចរៀបចំ​ឧស្សាហកម្មមួយដែលមានរបៀបរៀបរយ អាចបង្កើត​នូវបរិយាកាស​មួយដែលមនុស្សនិងស្ថាប័នអាចបង្កើតនូវវប្បធម៌សិក្សាស្រាវជ្រាវ បង្កើតនូវផលិតផលថ្មី ។ឯកឧត្តមសង្ឃឹមថាផ្ដើម​ចេញពីថ្ងៃនេះ និងទីតាំងពិព័រណ៍នេះ យើងអាចមើលឃើញនូវនវានុវត្តន៍ផ្នែកហិរញ្ញវត្ថុ ដើម្បីជួយទ្រទ្រង់ឧស្សាហកម្មនេះ និងនវានុវត្តន៍គំនិតថ្មីៗទាក់ទិននឹង​ឧស្សាហកម្មនេះផងដែរ ។

ឯកឧត្តមឧបនាយករដ្ឋមន្រ្តី បានរំលេចពីសកម្មភាពចុះបញ្ជីដីធ្លី ដែលមកទល់ពេលនេះយើងបានវាស់វែងចុះបញ្ជី​បន្ថែម​បានប្រមាណ​២លាន៣សែនក្បាលដី និងនៅសល់ជាង ១លានក្បាលដីទៀតនឹង​ត្រូវបញ្ចប់ការចុះបញ្ជីនៅទូទាំងប្រទេស ដែលនេះប្រហែល​ជាលើកទី១ ក្នុងប្រវត្តិសាស្ត្ររបស់កម្ពុជាដោយបានវាស់វែងនិងចុះបញ្ជីដីទាំងអស់នៅទូទាំងប្រទេស​បានចប់សព្វគ្រប់ក្នុង​អាណត្តិ​ទី៧នេះ។ ដោយឡែក ក្បាលដីដែលនៅសេសសល់មិនទាន់បានចុះបញ្ជី រដ្ឋបាលខេត្តព្រះ​វិហារបានប្ដេជ្ញាចិត្តក្នុងការ​បញ្ចប់ការចុះ​បញ្ជីដីធ្លី​ឱ្យបានមុនឆ្នាំ២០២៩ ដែលជាគម្រប់ខួបលើកទី ៤០ នៃការចេញបណ្ណកម្មសិទ្ធិដីធ្លីជូនប្រជា​ពលរដ្ឋនៅក្នុងប្រទេសកម្ពុជា។

ឯកឧត្តមឧបនាយករដ្ឋមន្ត្រី សាយ សំអាល់ បានបង្ហើបថា នាពេល​ខាងមុខនឹងមានការរៀបចំពិព័រណ៍បែបនេះឱ្យបានធំជាងមុន ក្រោមការគាំទ្រយ៉ាងពេញទំហឹងពីក្រសួងរៀបចំដែនដី ដែលនឹងផ្ដល់ឱកាសកាន់តែច្រើនសម្រាប់វិស័យសំណង់ អគារ វិស្វកម្មនៅ​កម្ពុជា។

ឯកឧត្តមបន្ថែមថា ដោយឡែកការជួបជុំគ្នានាពេលនេះគឺជាឱកាស​ដ៏ល្អប្រសើរដើម្បីជជែកពិភាក្សារកវិធីសាស្ត្រ​ធ្វើយ៉ាងណា​ឱ្យការងារដែលយើងទាំងអស់គ្នាកំពុងធ្វើទទួលបានប្រសិទ្ធភាពខ្ពស់ ។ធ្វើឱ្យឧស្សាហកម្មទឹកមានរបៀបរៀបរយស៊ីចង្វាក់គ្នា ទទួល​បាន​ផលចំណេញកាន់តែច្រើន បង្កើនផលិតភាពសម្រាប់ប្រជាជន​។ទឹកស្អាត គឺជាអាទិភាពធំមួយរបស់រាជ​រដ្ឋាភិបាល៕

CATEGORIES